Актуаліі

Абрад “Провады русалкі” звязаны з заканчэннем святкавання на восьмым тыдні пасля Вялікадня Русальнага тыдня, праводзіцца штогод у нядзелю пасля Тройцы.

Гарадоцкае ажурнае ткацтва (“кісея”) – унікальны від беларускай народнай творчасці, які вядомы на Гарадоччыне з другой паловы XIX ст. Адметнай асаблівасцю ажурных тканін (ручнікоў, “набожнікаў”, абрусаў) з’яўляецца разрэджаная сеткавая структура. Малюнак ствараюць празрыстыя геаметрычныя шэрагі палос і квадратаў. Для ткацтва такіх тканін выкарыстоўваюцца адбеленыя ільняныя ніці. Краі вырабаў упрыгожваюцца карункамі, якія вязаныя кручком з белых ільняных нітак.

Традыцыя ткацтва паясоў на Валожыншчыне адметная тэхналогіяй ткацтва “на ніту” – раней распаўсюджанай па ўсёй тэрыторыі Беларусі, але менавіта ў Валожынскім раёне захаванай носьбітам традыцыі Марыяй Мікалаеўнай Стасяловіч. Цікавы спосаб замацавання нітак падчас ткання: аснова не прывязваецца да нерухомага прадмета для стварэння нацяжэння, а замацоўваецца на таліі і выцягнутай назе ткачыхі. Гэта дазваляе ткаць там, дзе няма зручнага прадмета для мацавання асновы.

Абрадавая гульня “Пахаванне дзеда” прымеркавана да Масленічнага тыдня. Бытаванне абраду ў межах супольнасцей вёскак Маскаленяты і Даўгаполле Гарадоцкага раёна неперарыўнае. У дзеі, якая праводзіцца кожны год у першы панядзелак Масленіцы, удзельнічаюць у асноўным жанчыны, прычым сталага ўзросту.